និយាយដល់យុវជនម្នាក់ឈ្មោះ ផាន គីមសុង អាយុ២៨ឆ្នាំ ជាបេក្ខជនក្នុងកម្មវិធីប្រឡងចម្រៀងលំដាប់ថ្នាក់ពិភពលោកCambodian Idol រដូវកាលទី៤ មកពីខេត្តកំពង់ធំ ប្រិយមិត្តច្បាស់ជានឹកឃើញភ្លាមថា ក្នុងវគ្គ Judge Audition រូបគេមានសមត្ថភាពដ៏អស្ចារ្យ ដែលអាចច្រៀងត្រាប់កំពូលតារាចម្រៀងបានជាច្រើនរូប។
អ្វីដែលកាន់តែចាប់អារម្មណ៍ថែមមួយកម្រិតទៀត នៅពេលនោះ រូបគេទទួលបានសំបុត្រមាសរហូតដល់ទៅ៤ឯណោះ ដោយកាត១សម្រាប់ការច្រៀងខ្លួនឯង និងកាត៣ទៀត សម្រាប់ការច្រៀងធ្វើត្រាប់តាមសំឡេង លោក ព្រាប សុវត្ថិ, លោក ណយ វ៉ាន់ណេត និងលោកឆន សុវណ្ណរាជ។
ការបង្ហាញសមត្ថភាពដ៏អស្ចារ្យនេះ ត្រូវបានពិធីការិនី និយាយអមកម្មវិធីថា «គ្រាប់ពេជ្រមួយគ្រាប់ បានបង្ហាញខ្លួន សមត្ថភាពពេញខ្លួនតែម្ដង សមណាស់ ដែលទទួលបាន«យេស»៤។ តាំងពីពេលនោះមក រូបគេនៅតែបង្ហាញសមត្ថភាពដ៏អស្ចារ្យ រហូតជាប់ឈានមកដល់វគ្គLive Showសប្ដាហ៍ទី៤។
នៅក្នុងវគ្គនេះ ឃើញថា រូបគេនៅតែជាគ្រាប់ពេជ្រ ដដែល បើទោះប្រជាប្រិយភាពចាញ់គេ តែសមត្ថភាពមិនចាញ់បេក្ខជន បេក្ខនារីដទៃទៀតនោះឡើយ។ នៅក្នុងសប្ដាហ៍ទី៤នេះ បេក្ខជនទាំងអស់តម្រូវឲ្យច្រៀងបទបែប«Rock» ក្នុងនោះ ផាន គីមសុង បានលើកយកបទ«ឈឺសែនឈឺ» មកបកស្រាយបានយ៉ាងរលូន។
ទោះយ៉ាងណាអ្វី ដែលរូបគេធ្វើកាន់តែល្អជាងបទលើកយកមកប្រឡងខាងលើនេះ គឺការច្រៀងបទបន្ថែម នូវបទ «មើលពីក្រោយអែមណាស់, សម្រស់បុប្ផាកំពង់ធំ» បែបRockយ៉ាងពីរោះ ប្លែកអារម្មណ៍ សមជាម្ចាស់ពាន ធ្វើឲ្យអ្នកទស្សនា និងស្ដាប់មានអារម្មណ៍ស្រស់ស្រាយសប្បាយចិត្ត។
ជាលទ្ធផលចំពោះការបង្ហាញសមត្ថភាពដ៏អស្ចារ្យនេះ បើទោះមិនបានសំឡេងគាំទ្រដាច់គេ ពីទស្សនិកជន ក៏បេក្ខជន មកពីខេត្តកំពង់ធំរូបនេះ ជាប់Top 3ក្នុងវគ្គLive Showសប្ដាហ៍ទី៤នេះផងដែរ ខណៈTop 1បានទៅលើ ថុល សុភិទិ, Top 2 លីម តិចម៉េង៕ សូមទស្សនាវីដេអូខាងក្រោមនេះ ៖
