គេនៅចាំបានថា នៅក្នុងវគ្គLive Show សប្ដាហ៍ទី១, សប្ដាហ៍ទី២នៃកម្មវិធីលំដាប់ថ្នាក់ពិភពលោក Cambodian Idolរដូវកាលទី៤, បេក្ខជន ណាន វីសារ បានជាប់ដោយសុវត្ថិភាព តាមរយៈការបោះឆ្នោតពីទស្សនិកជន។
ដោយឡែកនៅក្នុងសប្ដាហ៍ទី៣ បើទោះរូបគេបកស្រាយចម្រៀងមរតកដើម មានចំណងជើង «ចម្រៀងស្នេហ៍» បានយ៉ាងពីរោះ លួងលោម ពេញមួយស្ទូឌីយោ យ៉ាងណាក៏ដោយ ក៏រូបគេមិនបានសំឡេងសារបោះឆ្នោតច្រើនពីទស្សនិកជននោះឡើយ។ និយាយរួមពេលនោះ រូបគេជាប់Top 10ស្ទើរតែធ្លាក់ទៅហើយនោះ។
ដោយឡែកឈានដល់វគ្គLive Showសប្ដាហ៍ទី៤ យុវជន ដែលមានប្រវត្តិតស៊ូរូបនេះ ក៏នៅតែបន្តធ្វើបានល្អដដែលក្នុងConceptបទបែបRock តែរូបគេមិនទទួលបានសារច្រើន ដែលអាចជាប់ក្នុងចំណោមបេក្ខជន បេក្ខនារី ៨នាក់ទៀត ដែលកក់កៅអីទៅវគ្គបន្ត នោះឡើយ។
ប្រការនេះ ធ្វើឲ្យរូបគេ បានត្រឹមយំឱប បេក្ខជន ស្រស់ រ៉ូឡុង ដែលទទួលសំឡេងសារតិចជាងគេដែរនោះ។ ទោះយ៉ាងណា ពួកគេ នៅមានឱកាសមួយទៀត ប្រសិនបើគណៈកម្មការ សម្រេចSaveរូបគេណាម្នាក់នោះ។ ក្រោយពិភាក្សាគ្នា គណៈកម្មការបានសម្រេចថាSave ធ្វើឲ្យពួកគេរាងរំភើបចិត្តវិញ។
ទោះយ៉ាងណាក្នុងកម្មវិធីទាំងមូលនេះ គណៈកម្មការមានសិទ្ធិSaveបានតែម្ដង ហើយបេក្ខជនម្នាក់ប៉ុណ្ណោះ ហើយគណៈកម្មការ បានប្រើសិទ្ធិនេះ នៅក្នុងវគ្គLive Showសប្ដាហ៍ទី៤នេះ ដោយសម្រេចSaveបេក្ខជន ណាន វិសារ ដើម្បីជាប់ឈានទៅវគ្គLive Showសប្ដាហ៍ទី៥បន្តទៀត។
ក្រោយជាប់ឈានទៅវគ្គបន្តនោះ នៅព្រឹកថ្ងៃទី៨ ខែសីហា ឆ្នាំ២០២២ ណាន វីសារ បានបង្ហោះសារដោយបញ្ជាក់ថា «យប់មិញនេះ គឺអារម្មណ៍ក្តុកក្តួល រន្ធ,,ត់ខ្លាំងមែនទែន ខ្ញុំអត់បានយំទេ តែទឹកភ្នែកវាហូរមកអត់ដឹងខ្លួន ហូរអត់ឈប់សោះហូរដោយសាររំភើបនឹងសំឡេងហ៊ោគាំទ្ររបស់បងប្អូន។
ម្រាមដៃដប់ ក្បាលក្រាបដល់ឆាក សូមអរគុណចំពោះការផ្តល់ឱកាសដ៏ពិសេសពីបងៗគណៈកម្មការ ដែលជួយសង្គ្រោះ save រូបខ្ញុំទៅសប្តាហ៍ទី៥ បន្តទៀត។
ខ្ញុំនឹងធ្វើឱ្យការ Save មួយនេះ ក្លាយទៅជាការ Save ដ៏មានតម្លៃបំផុត និងខិតខំប្រឹងដុះខាតសមត្ថភាពរបស់ខ្ញុំបន្ថែមទៀតឱ្យកាន់តែល្អ។
អរគុណដល់បងៗក្រុមការងារទាំងអស់ និងបងពិធីករទាំង២ ជាពិសេសសូមអរគុណពុកម៉ែបងប្អូនដែលចំណាយថវិកាផ្ទាល់ខ្លួន និងពេលវេលាដ៏មានតម្លៃ ផ្ញើរសារបោះឆ្នោតឱ្យរូបខ្ញុំ។
ខ្ញុំបាទសូមអរគុណសម្រាប់ការអាណិត ស្រលាញ់ដ៏ធំធេងពីពុកម៉ែប្អូនទាំងអស់គ្នាដល់រូបខ្ញុំ គឺខ្ញុំទទួលបានភាពកក់ក្តៅយ៉ាងខ្លាំងដែលខ្ញុំពុំធ្លាប់ទទួលបានពីមុនមក»៕
