ប្រិយមិត្ត មួយចំនួន បានជ្រាបរួចមកហើយថា កន្លងមក កូនស្រីរបស់អ្នកមេម៉ាយសម្បូរទ្រព្យ ទ្រី ដាណា ធ្លាប់ទម្លាយពីការចាយវាយរបស់ខ្លួនក្បិតក្បៀត ដោយមានលុយចាយត្រឹមតែ ៤ ៥ពាន់រៀល ធ្វើឲ្យអ្នកបានដឹងរួច ស្ទើរមិនគួរឲ្យជឿ សោះថា កូនអ្នកមានមួយទាំងមូលចាយលុយស្មើកូនអ្នកមានជីវភាពធម្មតានោះ។
ដាណាភីន ធ្លាប់បញ្ជាក់នៅលើបណ្ដាញសង្គមទីកតុកថា ខ្លួនមិនមានលុយទុកច្រើនដូចគេនោះទេ ហើយគេលក្ខណៈធម្មតាៗ តែគេមានលុយចាយច្រើន ខ្លួនមានលុយសន្សំ មានតែលុយចាយធម្មតា ៥ពាន់ ៤ពាន់អញ្ចឹងទេ។
កូនស្រីរបស់អ្នកស្រីទ្រី ដាណា រូបនេះ បានបញ្ជាក់ទៀតថា ការធ្វើបែបនេះ ដើម្បីខ្លួននាងចេះ តស៊ូ ចាយលុយចេះគិត។ ចំពោះពាក្យ ដែលដាណាភីន និយាយថា ខ្លួនមានលុយចាយធម្មតា ៥ពាន់ ៤ពាន់នោះ មតិជាច្រើនស្មានតែ៤ -៥ពាន់ដុល្លារ នោះ តែធាតុពិត៤ ៥ពាន់រៀលនោះទេ។
អ្វី ដែលកាន់តែចាប់អារម្មណ៍ទៀតនោះ ដាណាភីន មិនត្រឹមតែចេះចាយលុយសន្សំសំចៃនោះទេ ថែមទាំងរៀនពូកែថែមទាំងផង ដោយថ្មីៗនេះ នាងបានចូលរួមប្រកួតប្រជែងនិយាយភាសាអង់គ្លេសនៅសាលារបស់ខ្លួន ហើយបានជាប់លេខ២ទៀតផង។
ក្រោយពីកូនទទួលបានលទ្ធផលល្អបែបនេះ អ្នកស្រី ទ្រី ដាណា នៅថ្ងៃទី៩ ខែសីហា បានបង្ហោះរូបថត១សន្លឹក ពេលទៅអបអរកូនស្រី អមដោយសាររៀបរាប់ថា «ដឹងទេ ថាកូនស្រីជាមនុស្សម្នាក់ ដែលធ្វើឲ្យម៉ាក់មានសំណាងបំផុត អ្វី ដែលកូន បានធ្វើបាននៅថ្ងៃនេះ វាមានតម្លៃខ្លាំងណាស់ សម្រាប់ម៉ាក់ ជាកម្លាំងចិត្ត ជាថាមពល ជាភាពកក់ក្ដៅសម្រាប់ម៉ាក់
តាំងពីតូចមក ខ្ញុំមិនសូវបានមើលថែគាត់ដិតដល់ទេ ព្រោះជាប់រវល់រកស៊ី ប៉ុន្តែគាត់មិនដែលធ្វើអោយខ្ញុំពិបាកចិត្តម្ដងណាឡើយ។ ការចាយវាយ ខ្លាចចិត្ត មិនដែលមានលុយកាន់ច្រើនទេ សំលៀកបំពាក់ ទាល់តែខ្ញុំទិញជូនគាត់ ទើបគាត់បានថ្មីស្លៀកពាក់ដូចគេ
ពេលខ្លះ ក៏មានអារម្មណ៍ថា អាណិតកូន តែពេលខ្លះក៏មានអារម្មណ៍ថា ជាសំណាង ព្រោះគាត់ចេះគិតច្រើន មិនចាយវាយផ្ដេសផ្ដាស មិនដើរលេង មិនសម្ភារៈនិយម។ អរគុណកូនខ្លាំងណាស់ ដែលមិនធ្វើអោយម៉ាក់ម្នាក់នេះពិបាកចិត្ត
ពេលនេះកូនមិនទាន់ពេញវ័យ មិនទាន់ចេះតែងខ្លួន តែកូនពិតជាស្រស់ស្អាតខ្លាំងណាស់នៅក្នុងកែវភ្នែកម៉ាក់។ ទោះថ្ងៃក្រោយកូនពេញវ័យ អាចធ្វើអ្វីៗគ្រប់យ៉ាងដោយខ្លួនឯងបាន ក៏កូននៅតែជាក្មេងតូចម្នាក់ ដែលម៉ាក់បារម្ភ មើលថែ យកចិត្តទុកដាក់ជានិច្ច។
អរគុណលោកគ្រូ អ្នកគ្រូ ដែលជួយណែនាំ បង្ហាត់បង្រៀនគាត់ ផ្ដល់ចំណេះដឹងដល់គាត់ ក្លាយជាសិស្សឆ្នើមម្មាក់។ អរគុណសាលា ដែលជួយអោយគាត់ដើរមកដល់ថ្ងៃនេះ និងកំពុងបន្តទៅមុខទៀត មិនថាមានលុយ ឬគ្មានលុយ មនុស្សម្នាក់ៗមានសំណាង មានសុភមង្គលបំផុត គឺមានកូនល្អ ដើរតាមគន្លង ចេះគិតវែងឆ្ងាយ។ ថ្ងៃក្រោយ កូននឹងនៅតែជាក្មេងស្រីម្នាក់សម្រាប់ម៉ាក់ ដែលម៉ាក់ត្រូវមើលថែជានិច្ច»៕
