ប្រិយមិត្តមួយចំនួន ទំនងជាបានជ្រាបរួចមកហើយអំពីប្រវត្តិស្នេហារបស់លោកជំទាវ ស៊ន សៀវម៉ី ជាមួយនឹងលោក កែវ ដេវីត ដោយផ្ដើមឡើងពីចិត្ត និងចិត្ត បន្ទាប់មកទើបពួកខ្ញុំប្រាប់ម៉ាក់-ប៉ាទាំងសងខាងឲ្យដឹងឮនោះ។
ក្រោយស្វែងយល់ចិត្តគ្នារួចមក, ម្ចាស់ មេដាយមាស កីឡាអាស៊ី លោកជំទាវ ស៊ន សៀវម៉ី បានភ្ជាប់ពាក្យ ជាមួយលោក កែវ ដេវីត កាលពីថ្ងៃទី២៨ ខែឧសភា ឆ្នាំ២០២០កន្លងទៅនេះ ក្រោមការ ចូលរួមពីចាស់ទុំ សងខាង និងមិត្តភក្ដិ ជាច្រើនផងដែរ។
ក្រោយភ្ជាប់ពាក្យរួច នៅថ្ងៃទី២២ ខែកុម្ភៈ ឆ្នាំ២០២១ ស្របពេលស្ថានភាពកូ វី ដ១ ៩ កំពុងតានតឹង លោកជំទាវ ស៊ន សៀវម៉ី បានសម្រេចសែនព្រែនបន្តិចបន្តួចជាមួយគូដណ្ដឹង ដោយមានការអញ្ជើញត្រឹមតែមិត្តភក្ដិ បងប្អូនជិតស្និទ្ធ ប៉ុន្មាននាក់ មកចូលរួមពិធីប៉ុណ្ណោះ។
បន្ទាប់ពីសែនព្រេន បានប៉ុន្មានខែ លោកជំទាវ ស៊ន សៀវម៉ី ក៏ទទួលបានចំណងដៃ កូនក្នុងផ្ទៃម្នាក់ ដោយកូនស្រីរបស់លោកជំទាវ មានឈ្មោះ ដេវិដ ចេស៊ី – Devid Jessi កើតនៅថ្ងៃសុក្រ ទី០៨ ខែតុលា ឆ្នាំ២០២១ វេលាម៉ោង ៩យប់។
ដោយឡែក ថ្មីៗនេះ ជំទាវ ស៊ន សៀវម៉ី និងបងស្រី ស៊ន ដាវីន បានបណ្តើរគ្នាទៅលំហែរ នៅប្រទេសបារាំងយ៉ាងរីករាយឃើញ ហើយពិតជាកក់ក្តៅជាខ្លាំង។ បង្ហោះភ្ជាប់ជាមួយរូបថត២នាក់ប្អូនស្រី ស៊ន សៀវម៉ី ចេញពីប្រទេសបារាំង អ្នកនាង ស៊ន ដាវីន បានដាក់Captionយ៉ាងខ្លីថា «សាកថ្មជីវិត»។
ដ្បិតមានស្វាមី និងកូនរៀងខ្លួនទៅហើយក្តី តែបងប្អូនកីឡាការិនីជម្រើសជាតិពីររូបនេះ អត់ខ្វល់ បានដឹកដៃគ្នាទៅសាកថ្មឱ្យជីវិតយ៉ាងហាយសូរនៅប្រទេសបារាំង។ ក្នុងនោះ ជំទាវ ស៊ន សៀវម៉ី បានចែករំលែករូបថត និងសាររបស់បងស្រីចូលទៅគណនីហ្វេសប៊ុករបស់ខ្លួន ហើយនិយាយបែបលេងសើចថា «ថ្មហ្នឹងតែសាកញឹកបន្តិច ស៊ីផ្ដៅឥឡូវហើយ»៕
គួរបញ្ជាក់ថា ក្រោយរៀបការ និងមានកូនមក គេសម្គាល់ឃើញថា ជីវិតរបស់បងប្អូនកីឡាការិនីជម្រើសជាតិ តៃក្វាន់ដូទាំងពីរពោរពេញទៅដោយសុភមង្គល។ ចំពោះ លោកជំទាវ ស៊ន សៀវម៉ី កាលពីពេលថ្មីៗកន្លងទៅនេះ បានបង្ហាញពីបំណងរបស់ខ្លួនថា បើមានឱកាស ឆ្នាំក្រោយ លោកជំទាវ នឹងយកមេដាយជូនជាតិជាលើកចុងក្រោយ។ ដោយឡែក អ្នកនាង ស៊ន ដាវីន មិនដឹងថា នឹងងាកមកប្រឡូកអាជីពចាស់របស់ខ្លួន ឬបែបណានោះទេ៕
