ក្រោយពីមានចម្ងល់ជាច្រើន, អ្នកមេម៉ាយចាយរាង សម្បូរទ្រព្យ ទ្រី ដាណា ដែលអ្នកគាំទ្រមួយចំនួន ហៅថា ជាទេវតា លើដីនោះ នៅថ្ងៃទី៤ ខែសីហា ឆ្នាំ២០២២នេះ បានដាច់ចិត្តទម្លាយរូបមន្ត ធ្វើឲ្យខ្លួនលក់ដាច់។
បង្ហោះភ្ជាប់ជាមួយរូបថតរបស់ខ្លួនកំពុងអង្គុយលើឡាន ញញឹមញញែម១សន្លឹក ថៅកែហាងពេជ្រចិត្តធម៌ ទ្រី ដាណា រៀបរាប់ថា «ថ្ងៃនេះ ប្រាប់យ័ន្តពិសេសរបស់ខ្ញុំ មានមនុស្សជាច្រើន តែងតែសួរខ្ញុំថា ហេតុអ្វីបានជាខ្ញុំលក់អ្វីក៏ដាច់ទំនុកចិត្តរបស់អតិថិជនគឺសំខាន់បំផុត តើបងប្អូនហ៊ានទេនៅក្នុងការលក់របស់ល្អ ដែលមិនទទួលបានផលចំណេញតិច?
តើបងប្អូនហ៊ានទេនៅក្នុងការប្រាប់ទៅកាន់អតិថិជនដោយត្រង់ត្រង់ៗ? តើបងប្អូនហ៊ានទេនៅក្នុងការទទួលខុសត្រូវ ចំពោះផលិតផលបងប្អូន ដែលកំពុងតែមានបញ្ហា? តើបងប្អូនហ៊ានទេនៅក្នុងការលក់ដែលចំណេញតិច?
ខ្ញុំបានអនុវត្តការលក់បែបនេះតាំងតែពីដើមមក ការលក់របស់ខ្ញុំតាំងតែពីមុនខ្ញុំមានអតិថិជនតិចតួចបំផុតរហូតដល់អតិថិជនច្រើនបែបនេះ គឺខ្ញុំកសាងចាប់ពីការលក់ដែលមិនមានផលចំណេញច្រើន មនុស្សមិនតិចទេដែលគិតពីផលចំណេញខ្លាំងជាងគុណភាពបែបនេះគឺយើងនឹងបាត់បង់អតិថិជន
ប្រសិនបើផលិតផលរបស់បងប្អូនមានគុណភាពហើយ តើបងប្អូនខ្លាចទេនៅក្នុងការបាត់បង់អតិថិជន? ចំពោះខ្ញុំវិញ គឺខ្ញុំមិនខ្លាចបាត់បង់ទេ ដោយសារខ្ញុំបានចងបេះដូងអតិថិជននៅក្នុងផលិតផលរបស់ខ្ញុំរួចហើយ ដោយខ្ញុំសុខចិត្តលក់របស់ល្អ ហើយខ្ញុំយកចំណេញតិច
អាចនិយាយបានថា ការរកស៊ីរបស់ខ្ញុំឆោតហើយល្ងង់ ប៉ុន្តែខ្ញុំធ្វើមកបែបនេះវាបានផលពិតប្រាកដមែន ខ្ញុំកសាងអតិថិជនម្តងមួយៗដោយខ្ញុំមិនចង់បានអតិថិជនដែលចូលទិញមកច្រើនហើយទៅវិញបាត់អស់នោះទេ។
ខ្ញុំចាប់ផ្ដើមកសាងអតិថិជនពីតិចទៅច្រើនខ្ញុំរកស៊ីប្រកាន់ភ្ជាប់នូវទម្លាប់ ទទួលខុសត្រូវខ្ពស់ និងគុណភាពផលិតផលខ្ពស់ អ្នករកស៊ីដូចគ្នា តែងតែសួរខ្ញុំថា ហេតុអីបានជាខ្ញុំលក់ដោយមិនមានផលចំណេញច្រើន? ដូចនេះប្រាប់បងប្អូនត្រង់ទៅខ្ញុំសុខចិត្តឱ្យគេថាខ្ញុំល្ងង់ចុះ ប៉ុន្តែខ្ញុំស្រឡាញ់អតិថិជនរបស់ខ្ញុំហើយអតិថិជនរបស់ខ្ញុំនិងមានជំនឿនិងទុកចិត្តមកលើរូបខ្ញុំ
នេះជាចំណុចដែលខ្ញុំកសាងអតិថិជន ពេលដែលមានអតិថិជនហើយទោះចំណេញតិចក៏យើងលក់ដាច់រាល់ថ្ងៃ សរុបមក ខ្ញុំចង់ប្រាប់បងប្អូនថាសុខចិត្តចំណេញតិចតែអោយមានអតិថិជនច្រើនចេញចូលគឺក្តីសុខអ្នកលក់ហើយ»៕
